કોથમીર ની તીખી ચટણી
આ ચટણી એક સર્વ સામાન્ય છે , જે લગભગ દરેક ના ઘરે હોય જ . આ ચટણી તમે સેન્ડવીચ , કટલેટ , ભેળ , ફરસાણ , ચાટ કે દાળ ભાત સાથે પણ ખાય શકાય … દર ૭-૮ દિવસે મારા ઘરે આ ચટણી જરૂર બને.
દરેક ની બનવાની રીત અલગ હોય. આપ જ કહો કાળી પડેલી કે બેસ્વાદ ચટણી કોને ભાવે .. તીખાશ એ આ ચટણી તો મૂળ સ્વાદ છે પણ સાથે મીઠું અને ખટાશ પણ સરભર હોય તો જ રંગ જામે .. આ ચટણી ને ફ્રીઝ માં ૮-૯ દિવસ સુધી તાજા જેવી રાખી શકાય . જો ફ્રીઝેર માં નાના નાના ડબ્બા માં સાચવો અને જરૂર પ્રમાણે જ બહાર કાઢો તો આ ચટણી મહિનાઓ સુધી સાચવી શકાય .. આજે હું અહી આપને મારી રીત બતાવીશ. આશા છે પસંદ પડશે . રીત ની આખર માં અમુક મુદ્દા અચૂક વાંચજો જે ચટણી ને સ્વાદિષ્ટ અને લાંબો સમય તાજી બનાવી રાખવા માં મદદ કરશે.
સામગ્રી :
• ૨ પણી તાજી કોથમીર
• ૮-૧૦ તીખા લીલા મરચા (વધારે ઓછા સ્વાદ અને મરચા ની તીખાશ પ્રમાણે )
• મુઠીભર શીંગ દાણા
• ૧/૨ ચમચી સંચળ
• ૨.૫ ચમચી લીંબુ નો રસ
• મીઠું
• ૧/૪ ચમચી ખાંડ
રીત :
સૌ પ્રથમ કોથમીર ને સાફ કરી ધોઈ લો . થોડી કોરી પડે એટલે મોટી મોટી સુધારી લો . 
મિક્ષેર માં પેહલા શીંગ અને લીલા મરચા ને અધકચરા વાટી લો . હવે એમાં કોથમીર , મીઠું , સંચળ, ખાંડ અને લીંબુ ઉમેરો . 
થોડું થોડું પાણી ઉમેરી એકદમ જીણી વાટી લો . પાણી એકસાથે અને વધારે ઉમેરવું નહિ .
કાચ ની બોટલ કે એર ટાઈટ ડબ્બા માં ભરી ફ્રીઝ માં રાખો ..
નોંધ :
• ચટણી માટે ની કોથમીર હમેશા તાજી અને લીલી પસંદ કરવી . કરમાય ગયેલી કે પીળી પડેલી કોથમીર કદી પણ બ્રાઈટ અને લીલો કલર લાંબા સમય માટે નહિ આપે .
• એકદમ ઠંડુ(બરફ કે ફ્રીઝ નું ) પાણી ચટણી વાટવા માં વાપરવાથી પણ ચટણી નો કલર વધારે સમય માટે જાળવી શકાશે ..
• પૂરતા પ્રમાણ માં મીઠું અને લીંબુ નું પ્રમાણ પણ ચટણી ને લીલીછમ રાખશે .
• ચટણી ને વપરાશ ના સમયે જ ફ્રીઝ માંથી કાઢો અને ફરી તુરંત ફ્રીઝ માં મૂકી દો . તાપમાન માં ફેરફાર પણ ચટણી ને કાળી અને બેસ્વાદ બનાવી દે.
રસોઈની રાણી : રૂચી શાહ (ચેન્નાઈ)
મિત્રો, આપ સૌ ને મારી આ રેસિપી કેવી લાગી ? કોમેન્ટ માં અચૂક જણાવજો…જેથી નવી વાનગી આપવા માટે મને ઉત્સાહ રહે…
દરરોજ અવનવી વાનગી માટે લાઇક કરો અમારું પેજ – રસોઈની રાણી.