ઓસ્ટ્રેલિયા સામેની પ્રથમ વનડેમાં ભારતની જીતનો હીરો રવિન્દ્ર જાડેજા રહ્યો હતો. 8 મહિના પછી ODI ક્રિકેટમાં વાપસી કરી રહેલા આ ખેલાડીએ પોતાના ઓલરાઉન્ડ પ્રદર્શનના આધારે ટીમ ઈન્ડિયાને જીત અપાવી.જાડેજાએ પ્રથમ બોલિંગમાં બે વિકેટ લીધી હતી અને ફિલ્ડિંગમાં પણ શાનદાર પ્રદર્શન કર્યું હતું. આ પછી, તે મુશ્કેલ પરિસ્થિતિમાં આવ્યો અને તેણે 45 રનની અણનમ ઇનિંગ રમીને ટીમને જીત અપાવી. આ દરમિયાન જાડેજાએ કેએલ રાહુલ સાથે 6ઠ્ઠી વિકેટ માટે સદીની ભાગીદારી પણ કરી હતી. જાડેજાને તેના જોરદાર પ્રદર્શન બદલ મેન ઓફ ધ મેચનો એવોર્ડ આપવામાં આવ્યો હતો. આ એવોર્ડ મળતાં જ તે વિરાટ કોહલીની સ્પેશિયલ ક્લબમાં સામેલ થઈ ગયો છે.
હવે વિરાટ કોહલી અને રવિન્દ્ર જાડેજા એવા બે ભારતીય ખેલાડી બની ગયા છે જેમણે ઓસ્ટ્રેલિયા સામે દરેક ફોર્મેટમાં મેન ઓફ ધ મેચનો એવોર્ડ જીત્યો છે. તમને જણાવી દઈએ કે, જાડેજા ODI પહેલા ચાર મેચની બોર્ડર ગાવસ્કર ટ્રોફી 2023ની પ્રથમ બે મેચમાં મેન ઓફ ધ મેચ રહ્યો હતો. તે જ સમયે, આ શ્રેણીમાં તેના શ્રેષ્ઠ પ્રદર્શન માટે તેને મેન ઓફ ધ સિરીઝનો એવોર્ડ પણ આપવામાં આવ્યો હતો.જણાવી દઈએ કે રવિન્દ્ર જાડેજાએ ગયા વર્ષે જુલાઈમાં ઈંગ્લેન્ડ વિરુદ્ધ આ સીરિઝ પહેલા પોતાની છેલ્લી વનડે રમી હતી. જે બાદ તે ઈજાના કારણે ODI ટીમની બહાર રહ્યો હતો અને ગયા મહિને જ તેણે ઓસ્ટ્રેલિયા સામેની ટેસ્ટ શ્રેણી દ્વારા ભારતીય ટીમમાં પ્રવેશ કર્યો હતો.
મેચની વાત કરીએ તો સિરાજ અને શમીની ત્રણ વિકેટના આધારે ભારતે ઓસ્ટ્રેલિયાને 35.4 ઓવરમાં 188 રનમાં ઓલઆઉટ કરી દીધું હતું. જવાબમાં ભારતની શરૂઆત પણ ઘણી નબળી રહી હતી અને પાંચમી ઓવરમાં જ મિચેલ સ્ટાર્કે વિરાટ કોહલી અને સૂર્યકુમાર યાદવને સસ્તામાં મોકલી દીધા હતા. જોકે આ પછી રાહુલ (અણનમ 75) અને રવિન્દ્ર જાડેજા (અણનમ 45)એ છઠ્ઠી વિકેટ માટે 108 રનની અતૂટ ભાગીદારી કરીને ટીમને 39.5 ઓવરમાં પાંચ વિકેટે 191 રન સુધી પહોંચાડી દીધી હતી. જાડેજાએ બોલિંગમાં પણ બે વિકેટ લીધી હતી અને ઓલરાઉન્ડ રમતના આધારે તે ‘પ્લેયર ઓફ ધ મેચ’ તરીકે ચૂંટાયો હતો.