દેશમાં મેન્યુફેક્ચરિંગને પ્રોત્સાહન આપવા માટે શરૂ કરવામાં આવેલી સરકારની પ્રોડક્શન લિન્ક્ડ ઇન્સેન્ટિવ (PLI) સ્કીમના લાભો હવે રોજગાર મોરચે પણ મળવા લાગ્યા છે. આ યોજનાની રજૂઆત પછી, દેશની નિકાસમાં ભાગ લઈ રહેલો મોબાઈલ મેન્યુફેક્ચરિંગ ઉદ્યોગ આ વર્ષે ઝડપથી વિસ્તરણ કરશે.જેના કારણે ચાલુ નાણાકીય વર્ષમાં દેશના મોબાઈલ મેન્યુફેક્ચરિંગ ઈન્ડસ્ટ્રીમાં 1,50,000 નવી નોકરીઓનું સર્જન થવાની ધારણા છે.
અંગ્રેજી અખબાર ઇકોનોમિક ટાઇમ્સમાં પ્રકાશિત થયેલા અહેવાલમાં રિક્રુટમેન્ટ ફર્મના અધિકારીઓને ટાંકીને કહેવામાં આવ્યું છે કે મોટા હેન્ડસેટ ઉત્પાદકો ભારતમાં મોટા પાયે હાયરિંગની યોજના બનાવી રહ્યા છે. રિપોર્ટમાં જણાવવામાં આવ્યું છે કે ચીનની બહાર મેન્યુફેક્ચરિંગ તરફ વૈશ્વિક શિફ્ટ અને ભારત સરકારની પ્રોડક્શન-લિંક્ડ ઇન્સેન્ટિવ સ્કીમને કારણે આ ફેરફાર જોવા મળી રહ્યો છે.
રિપોર્ટમાં જણાવવામાં આવ્યું છે કે સેમસંગ, નોકિયા, ફોક્સકોન, વિસ્ટ્રોન, પેગાટ્રોન, ટાટા ગ્રુપ અને સાલકોમ્પ જેવા મોટા કોર્પોરેટ દિગ્ગજો દેશમાં તેમના કર્મચારીઓની સંખ્યામાં વધારો કરે તેવી શક્યતા છે. ટીમલીઝ, રેન્ડસ્ટેડ, ક્વેસ અને સીલ એચઆર સર્વિસીસ જેવી સ્ટાફિંગ કંપનીઓએ જણાવ્યું છે કે આ નાણાકીય વર્ષમાં અંદાજિત 120,000-150,000 નવી નોકરીઓનું સર્જન થશે. તેમાંથી, લગભગ 30,000-40,000 ભરતીઓ સીધી જગ્યાઓ પર થવાની સંભાવના છે.
ટીમલીઝ સર્વિસિસના સીઈઓ (સ્ટાફિંગ) કાર્તિક નારાયણે ETને જણાવ્યું હતું કે, “મોટાભાગની મોબાઈલ બ્રાન્ડ્સ અને તેમના કમ્પોનન્ટ મેન્યુફેક્ચરિંગ અને એસેમ્બલી પાર્ટનર્સ, જેઓ ભારતમાં કોઈક પ્રકારનું મેન્યુફેક્ચરિંગ પહેલેથી જ સ્થાપી રહ્યા છે અથવા તે સ્થાપવા માગે છે, તેઓ હાયરિંગમાં વધારો કરી રહ્યા છે.” અહેવાલમાં, Quess અને CIL ના HR એક્ઝિક્યુટિવ્સે જણાવ્યું હતું કે FY2023 ની સરખામણીમાં તેઓએ ચાલુ નાણાકીય વર્ષમાં ભરતીમાં 100 ટકાનો વધારો જોયો છે.