મોરબી પુલ અકસ્માત બધાને જ યાદ છે. આ અકસ્માત યાદ આવતા જ તેની તસવીરો અને વિડીયો ચેહરાની સામે આવવા લાગે છે. મોરબીનો પુલ તૂટતાં હજારો લોકોએ પોતાના પરિવારના સભ્યો ખોયા છે. આ અકસ્માત ક્યારેય પણ કોઈ ભૂલી શકશે નહીં.
ગુજરાતના શહેરી વિકાસ વિભાગે મોરબી નગરપાલિકાને કારણદર્શક નોટિસ પાઠવીને તેને કેમ દૂર ન કરવી તે અંગે ખુલાસો માંગ્યો છે. મોરબી ઝુલતા પુલના સમારકામની મંજુરી આપવા અને તેને જાહેર જનતા માટે ખુલ્લો મુકવાની મંજૂરી આપવામાં નગરપાલિકા દ્વારા ફરજમાં બેદરકારી દાખવવામાં આવી હોવાની ગુજરાત હાઈકોર્ટ સમક્ષ રાજ્ય સરકારે કરેલી રજૂઆત બાદ બુધવારે શો-કોઝ નોટિસ ફટકારવામાં આવી હતી.
મોરબીની ઘટનામાં 30 ઓક્ટોબરની સાંજે મચ્છુ નદી પર બનેલો ઝૂલતો પુલ ધરાશાયી થયો હતો, જેમાં 135 લોકોએ જીવ ગુમાવ્યા હતા અને આ અકસ્માતમાં અનેક લોકો ઘાયલ પણ થયા હતા. આ પુલ તાજેતરમાં નવીનીકરણ બાદ કાર્યરત કરવામાં આવ્યો હતો. જેનું સમારકામ ઓરેવા ગ્રુપ દ્વારા કરવામાં આવ્યું હતું. ભાજપના નેતા કમલેશ દેસાઈની આગેવાની હેઠળ નગરપાલિકાના 49 સભ્યોએ કોર્ટ સમક્ષ રાજ્ય સરકારના સોગંદનામાનો વિરોધ કરતા જણાવ્યું હતું કે તેઓ પુલના સમારકામનો કોન્ટ્રાક્ટ આપવામાં સામેલ નથી અને જો સરકાર મોરબી નગરપાલિકાને સુપરસીડ કરે તો બાકીના લોકો સાથે અન્યાય થશે. .
પાલિકાના અન્ય એક સભ્યએ જણાવ્યું હતું કે, માત્ર ત્રણ સભ્યો, ચેરમેન કે.કે. પરમાર, ઉપપ્રમુખ જયેન્દ્રસિંહ જાડેજા અને સ્ટેન્ડિંગ કમિટીના ચેરમેન જવાબદાર છે. પરમારે મીડિયાને જણાવ્યું હતું કે તેમની ઓફિસને કારણ બતાવો નોટિસ મળી છે, પરંતુ તેઓ શહેરની બહાર હોવાથી તેમણે વ્યક્તિગત રીતે તે વાંચ્યું નથી. પરમારે જણાવ્યું હતું કે તેઓ જનરલ બોર્ડની બેઠક બોલાવશે, જેમાં સર્વાનુમતે નક્કી કરવામાં આવશે કે પાલિકાએ નોટિસનો શું અને કેવી રીતે જવાબ આપવો.