T20 ક્રિકેટ એટલે ચોગ્ગા અને છગ્ગાની રમત. અહીં મોટા સ્કોર જોવા મળે છે. એક ટીમે મેચમાં લગભગ 280 રન બનાવ્યા છે, પરંતુ બહુ ઓછા લોકો માને છે કે ટીમ માત્ર 2 બોલમાં મેચ જીતી જાય છે. આવું બન્યું છે અને તે પણ T20 ઇન્ટરનેશનલ મેચમાં. સ્પેને આ આઈલ ઓફ મેન ટીમ સામે કર્યું હતું. આ મેચમાં આઈલ ઓફ મેનની ટીમ પહેલા રમતા 10 રન જ બનાવી શકી હતી. ટી20માં આ સૌથી ઓછો સ્કોર છે. જવાબમાં સ્પેને માત્ર 2 બોલમાં મેચ જીતી લીધી હતી. આ રેકોર્ડ બંને દેશો વચ્ચે T20 દ્વિપક્ષીય શ્રેણીમાં બન્યો હતો.
પુરૂષોના ટી-20ના રેકોર્ડ પર નજર કરીએ તો આ પહેલા સૌથી ઓછો સ્કોર સિડની થંડરનો હતો. ગયા વર્ષે 16 ડિસેમ્બરે સિડની થંડર ટીમ એડિલેડ સ્ટ્રાઈકર્સ સામે માત્ર 15 રન બનાવી શકી હતી. મેચમાં સ્પેને ટોસ જીતીને બોલિંગ કરવાનો નિર્ણય લીધો હતો. આઈલ ઓફ મેનની ટીમ 8.4 ઓવરમાં 10 રન બનાવીને ઓલઆઉટ થઈ ગઈ હતી. 7 બેટ્સમેન ખાતું પણ ખોલાવી શક્યા ન હતા. માત્ર 4 બેટ્સમેન રન બનાવી શક્યા હતા.
આઈલ ઓફ મેન તરફથી 7મા નંબરે ઉતરેલા જોસેફ બારોસે સૌથી વધુ 4 રન બનાવ્યા હતા. આ સિવાય 3 બેટ્સમેનોએ 2-2 રન બનાવ્યા હતા. લેફ્ટ આર્મ ફાસ્ટ બોલર મોહમ્મદ કામરાને 4 ઓવરમાં 4 રન આપીને 4 વિકેટ લીધી હતી. તેમાં હેટ્રિકનો પણ સમાવેશ થાય છે. અન્ય ફાસ્ટ બોલર આતિફ મોહમ્મદે 4 ઓવરમાં 6 રન આપીને 4 વિકેટ ઝડપી હતી. આ સાથે જ લેગ સ્પિનર લોર્ને બર્ન્સે 4 બોલમાં 2 વિકેટ લઈને આઈલ ઓફ મેન ટીમને સમેટી લીધી હતી. તેણે એક પણ રન આપ્યો ન હતો.
જવાબમાં સ્પેને 2 બોલમાં ટાર્ગેટ હાંસલ કરી લીધો હતો. જોસેફનો પહેલો બોલ નો બોલ હતો. આગામી 2 બોલ પર અવેશ અહેમદે સિક્સર ફટકારીને ટીમને જીત અપાવી હતી. ટીમે 118 બોલ બાકી રહેતા મેચ જીતી લીધી હતી. આ પણ એક રેકોર્ડ છે. આ પહેલા કેન્યાએ માલી સામે 105 બોલ બાકી રહેતા મેચ જીતી લીધી હતી. આઈલ ઓફ મેન 2004માં ICCનો સભ્ય બન્યો. 2017માં તેમને એસોસિએટ મેમ્બરની મેમ્બરશિપ મળી હતી. ટીમ યુરોપિયન T20 વર્લ્ડ કપના ક્વોલિફાયર પણ રમી ચૂકી છે.